ماهي الية تسعير البتكوين والعملات المعممة المشفرة؟
- هنفترض اني انا لوحدي انتجت كرسي مكتب و روحت لشخص ابيعه ليه ب ٣٠٠ جنيه، عجبوا الكرسي و خده، كدة سعر الكرسي عندي ٣٠٠ جنيه زي ما بعته، حصل طلب عليه ٥ كراسي عملتهم و بعتهم بنفس السعر لاني لسة قادر علي الانتاج لوحدي، لكن فجأة لقيت اطلب مني ١٠٠ كرسي، فبكدة الانتاج زاد و هيحتاج مكان اكبر للتصنيع مع عمالة ازيد مع مصاريف تشغيل اكتر فالمنتج تكلفته هتزيد بسبب مصاريف التشغيل الجديدة و عليه سعر المنتج هيغلي هو كمان فهنقول ان الكرسي بقي سعره ٤٠٠ جنيه، الطلبيات فضلت مرتفعة لفترة لحد لما حصل تشبع في السوق "يعني خلاص السوق مش محتاج الكمية الكبيرة اللي بنتجها ده" فمضطر اخفض كمية الكراسي و عليه هقلل مصاريف التشغيل لان مفيش طلب علي الكراسي تحتاج التكلفة العالية ده، و عليه سعر الكرسي هيقل ل ٣٥٠ جنيه مثلًا، هو ده باختصار قانون العرض و الطلب، الطلب يزيد علي المنتج و المعروض قليل السعر يزيد قدامها، الطلب قل علي المنتج و المعروض زايد يقل السعر قدمها، يعني بين الطلب و السعر علاقة طردية و بين العرض و السعر علاقة عكسية.
- ده بالضبط اللي بيحصل مع البيتكوين مع الاختلاف ان البيتكوين ليه كمية محددة لا يمكن زيادتها، و كدة من ضمن خصائصه المحدودية و ده بيكون عامل من عوامل زيادة الطلب و السعر عليه مع قلة المعروض.
- بعد ظهور البيتكوين في ٢٠٠٩ تقدر تقول كان اوائل عمليات تسعير البيتكوين تمت في يوليو ٢٠١٠ مع سعر ٠.٠٠٠٨$ مع زيادة الطلب عليه و محدودية المعروض وصل سعره ل ٠.٠٨$ اخر نفس الشهر تقريبًا.
- طيب هل ده نفس اللي بيحصل مع كل العملات القديمة او الجديدة؟
- خلينا نفرق بين العملات القديمة و الجديدة، لان في عملات قيمتها بتتحدد نفس اللي حصل مع البيتكوين زي الايثريوم علي سبيل المثال بتعتمد علي ال use-case الخاصة بالعملة ، اما العملات الجديدة بيتحدد سعرها علي اساس "السعر المبدئي او ال initial price"!
- يعني ايه ال initial price ؟
- قررت اعمل عملة جديدة اسمها مثلًا "درويش" و عددها مليون عملة، و جيت انزلها في السوق للتداول ولكن العملة ملهاش قيمة، حرفيا المليون عملة بتساوي صفر، علشان ااقدر احل المشكلة ده بحدد انا السعر المبدأي للعملات، وده عن طريق اني بحط قدمها كمية من العملات اللي ليها سعر بتتداول بيه،
علي سبيل المثال انا عايز سعر العملة الواحدة من "درويش" يساوي ٠.٥٠$ و بقول مثلًا انا هحط عملة الايثر قصاد عملتي علشان احدد القيمة، بإفتراض ان الايثر سعرها الحالي ١٥٠٠$ يبقي كدة محتاج اعرف كمية الايثر اللي هربطها بعملتي علشان اخلي سعر العملة الواحدة ٠.٥٠$،
فالمعادلة هتكون كالتالي :
سعر العملة المطلوب * العدد الاجمالي للعملات مقسوم علي سعر عملة الإيثر
(٠.٥٠$ السعر المطلوب لكل "درويش" * ١،٠٠٠،٠٠٠ عملة درويش) / ١،٥٠٠$ سعر الإيثر = ٣٣٣ ايثر تقريبًا، ده كمية الايثر اللي محتاج اربطها بعملتي علشان سعرها يكون ٠.٥٠$ و السعر هيزيد تباعًا مع زيادة الطلب زي ما وضحت في الأول.
- طعبًا في عوامل كتير ثانوية بتحدد حركة السعر زي الانزلاق السعري ال slippage و نسبة العائد السنوي علي الاقراض APY ....الخ
ان شاء الله هبقي اوضح مفاهيم ال slippage, APY, overbought, oversold, overvalued كل ده من الناحية التقنية اكتر منها من الناحية الاقتصادية.
هل العملات الرقميه هتبقي المستقبل فعلا ولا مجرد ترند هيفضل فتره ويختفي ؟
لان في ناس سمعت ليهم فيديوهات بيقولوا ان نظام التعدين بتاعهم مضر للبيئه ومستحيل يستمر ؟
لو جاوبت علي سؤالك فقط "هل العملات الرقمية هتبقي المستقبل" فلو تقصد العملات الرقمية اللي هي الصورة الديجيتال من العملات المحلية زي اليورو و الدولار ...الخ "راجع مقال نظره حول تداول العملات المشفرة في قطر و مصر", فأيوة هتبقي المستقبل.
اما لو تقصد العملات المشفرة بدل العملات الرقمية, فسؤالك لحد كدة هقولك لا ملهاش مستقبل, اما لو قولت "هل البلوكتشين و التطبيقات بتاعتها ليها مستقبل" هقولك ايوة البلوكتشين وجد ليبقي.
و من نحية ضرر البيئة فالتعدين مضر بالبيئة بسبب استهلاكه للكهرباء اللي بيتم انتاجها من الوقود الأحفوري. ولكن نجاح البلوكتشين من عدمه مش متوقف علي التعدين, لان التعدين ده مجرد طريقة التأكد من صحة المعاملات و اتوجدت طرق كتير تختلف عن التعدين بالشكل التقليدي اللي بيحتاج اجهزة عتادها قوي علشان تقوم بالمهمة ده.
خلينا اقول اني عملت عملة درويش وانا صاحبها وربطها ب333 ايثر عشان يكون سعرها 0,5
انا كصاحب عملة اي الحالة اللي ممكن اخسر فيها؟!
وطبعا لما هعمل كدا هكون صاحب 1,000,000 درويش كلهم وهيكون الاوبشن للمستخدمين شراء فقط ولما يحصل شراء سعر هيزيد بس لو كل مستثمرين قررو بيع العملة بتاعتي مستحيل تنزل عن سعر 0,50 مبدئي صحيح؟
كل دة حلو ايه بقا الي هيخليني اشتري العملة درويش و هي حاجة كانت بصفر و لوحدها بقت بنص دولار
لو بتتكلم من باب المنطق فمفيش منطق يلزمك بده لو بتتعامل علي اساس ان العملة ملهاش use case اما لو بتتعامل بمبدأ الكريبتو فعادي جدًا تلاقي واحد رايح يدفع ملايين في عملة اسمها "كلب" و ده خارج حدود المنطق, SCAM ONLY!!
BY: Mohammed Darwish (ببسط مفاهيم البلوكتشين)
