ما الفرق بين الدفع بالعملة المشفرة واستخدام الفيزا والماستركارد؟

مع التطور المذهل لتقنية البلوكتشين اصبح الاعتماد علي المعاملات المادية بالعملات المشفرة مثل البتكوين والايثريوم وغيرها ضرورة ملحة ولكن هناك بعض المشاكل في هذا، وفي هذا الموضوع نستعرضها بشكل مبسط.

 رغيف السجق ب ٠.٠٠٠٠٥٩ بيتكوين

(سيناريو ١ )

محل السندوتشات اللي جنب بيتك قبل الدفع بالبيتكوين ..

 وانت راجل آكيل .. نزلت للمطعم و قولتله عايز ساندوتش سجق، فجابهولك و كان حسابه ٣ دولار انت قولت تستخدم محفظة البيتكوين بتاعتك و تدفع بيها، بعد ما خلصت الساندوتش حسيت انك لسة جعان فجيت تطلب ساندوتش تاني الجرسون قالك هننتظر شوية لحد لما عملية الدفع الأولي تظهر في محفظتنا، وبعد دقايق قالك تقدر تطلب دلوقتي، فطلبت الساندوتش التاني و حاسبت، لسة مشبعتش فخادت التالت في الرابع في العاشر و كنت بتحاسب اول بأول و بتبقي مضطر تنتظر شوية لحد ما البيتكوين يتنقل من عندك للمطعم، لحد ما خلاص كبس علي نفسك الآكل، بتفتح المحفظة بتاعتك لقيت مخصوم منك ١٣٠ دولار بدل ما يتخصم منك ٣٠ دولار حق ال ١٠ ساندوتشات، قومت ناده علي مدير المطعم، قالك يا فندم حق الساندوتش ٣ دولار و مصاريف تحويل البيتكوين من محفظتك للمطعم ١٠ دولار لكل معاملة.

(سيناريو ٢)

اشتغلت انت في مكان وظيفتك تروح تحصل فلوس من اماكن متفرقة، وكان لسوء حظك الشنطة اللي معاك مش بتشيل اكتر من ١٠٠ الف جنيه و انت مطلوب منك تحصل يوميًا ٦٠٠ الف جنيه، فكنت بتبقي مضطر ترجع الشركة تسيب الفلوس و تروح تحصل تاني، و كان الموضوع مجهد و بيستهلك وقت كتير، جاتلك فكرة انك تحاول تعدل الشنطة ده علشان تخليها تاخد مبلغ اكبر لكن للأسف معرفتش لان الخامة اللي مصنوع منها الشنطة غير قابلة للتعديل.

طبعًا ال ٢ سيناريو اللي حكيتهملك ده قصص خيالية ولكن بتمثل فعلًا مشاكل معقدة من مشاكل البيتكوين خصوصًا و بعض العملات المشفرة عمومًا و في استخدمها كوسيلة دفع للسلع و الخدمات، و ده المشكلة الرئيسية اللي بتواجه البيتكوين من وقت انتشار استخدامه و اعتراف العلامات التجارية المختلفة بالبيتكوين كوسيلة دفع بجانب الدفع النقدي و الكروت البنكية.

 ممكن تقولي بس احنا ديما بنسمع ان البيتكوين برضوا مازال افضل من VISA و اكيد اسرع و ارخص!!

 للأسف لا، لان المشكلتين اللي بيظهروا وقت استخدام البيتكوين " ارتفاع مصاريف التحويل و التأخير في عمليات الدفع" مش موجودين في VISA و ده بيظهر في عدد المعاملات اللي بيقدر يعملها البيتكوين في الثانية tps (transfer per second) = ٧ tps و في اليوم ل ٦٠٤ الف تقريبًا لكن في VISA بتوصل من ١٧٠٠ ل ٢٤،٠٠٠  tps و في اليوم ل ١٥٠ مليون تقريبًا و MasterCard ل ٥٠٠٠ tps و في اليوم ل ٤٣٢ مليون تقريبًا و طبعًا مصاريف التحويل في فيزا و ماستر كارد لا تتعدي السنتات. 

 تابع:

طيب ايه السبب في ان البيتكوين عدد معاملاته قليلة و بطيئ كدة ؟ و ليه مفيش اي حل سريع للمشكلة ده؟

١- لو اتكلمنا علي عدد المعاملات ليه قليل فالبيتكوين وقت ما ساتوشي وضع الاساسات بتاعته ثبت حجم البلوك اللي بتتم فيها المعاملات علي ١ ميجا و ده حجم صغير جدًا بالنسبة للمعلومات اللي بتدخل البلوك،

 فاكر الفلوبي ديسك زمان، كان ميقدرش يشيل فيلم مثلًا لان حجمه صغير نفس الموضوع بالنسبة للبلوك الخاصة بالبيتكوين بيقدر فقط يشيل كمية محدودة من البيانات هي اللي ادت لقلة عدد المعاملات،

٢- اما بالنسبة للبطئ فده حصل نتيجة المشكلة رقم ١ + ان كل ١٠ دقايق بيطلع بلوك جديدة بمعدل ١٤٤ بلوك في اليوم كله و ده طبعًا عدد قليل جدٍا يكاد لايذكر مقارنة بشبكات البلوكتشين التانية اللي قدمت حلول توسع او بالمنافسين في عالم ال digital money.

٣- نيجي لمشكلة ان مصاريف التحويل عالية في البيتكوين وده علشان كل ما حصل ضغط في الشبكة بيزيد قدمها مصاريف التحويل كنوع من انواع الأمان للشبكة و ده بيتم عن طريق المعدنين لما بيجوا يختارو المعاملة اللي مفروض يتأكدوا من صحتها بيختاروا المعاملات اللي مصاريف تحويلها اعلي، كأنه مزاد انت عايز مصاريف تحويل معاملتك = كام سنت يبقي انت وحظك امتي المعاملة بتاعتك تنضاف في البلوك و ممكن تفضل في الطابور فترة و متنضفش لان في معاملات غيرك مزودا المصاريف بتاعتها علشان تتم عمليات التدقيق عليها اسرع، فالشبكة بتعلي المصاريف بطريقة اوتوماتيك.

و مكنش فيه حل سريع يحل المشكلة ده لعدم قابلية شبكة البلوكتشين للتعديل و تغيير الاساسات بتاعتها وده كان رغبة ساتوشي علشان يقدر يحافظ علي الأمان للشبكة نقدر نقول انه البسبب اللي ظهر من خلاله معضلة ال scalability trilemma 

الي بيمثلها مثلث مكون من ٣ اضلاع كل ضلع بيعبر عن خاصية من خصائص شبكات البلوكتشين اللي مفروض يكونوا عصب اي شبكة وهم (الأمان، اللامركزية، قابلية التوسع)

طيب ليه اتوصفت بإنها معضلة؟

"

علشان من الصعب ان شبكة بلوكتشين تقدر تجمع بين ال ٣ عناصر في نفس الوقت، بمعني لو الشبكة اهتمت بقابلية التوسع و الامان مش هتقدر تهتم باللامركزية، ولو تم الاهتمام بقابلية التوسع و اللامركزية، فهيكون في مشكلة في الأمان ... وهكذا، وده السبب اللي خلي شركات ناشئة تقدم حلول جديدة بتسمي ال layer 2 solutions او حلول الطبقة الثانية. تطبيقات بتتبني علي الطبقة الأولي للبلوكتشين زي شبكة البيتكوين الطبقة الأولي و الطبقة التانية اللي مبنية عليها ال Lightning Network و زي الايثريوم الطبقة الأولي و حلول ال rollup كطبقة تانية تتبني عليها زي شبكة Polygon. 

أعتقد لان فكرة البيتكوين من الأساس يكون زى الذهب لحفظ القيمة بشكل عام، وليس عملة للدفع والاستخدام اليومى التقليدى زى باقى العملات العادية الخاصة بالدول، والعملة او الشبكة اللى المفروض بتحل المشكلة دى هى الريبل لكن طبعا هتخسر نقطة اللامركزية.

بواسطة: Mohammed Darwish (ببسط مفاهيم البلوكتشين)

قد يهمك