سدادات حزام الأمان Seat Belt Stopper Silent Mode احد الاكسسورات التي للأسف اعتماد الكثير من قائدي السيارات الملاكي استخدامها لمنع صوت صفارة الانذار الخاص بوضع حزام الامان بالسيارة ولكن قد تكون هذه هي اكبر غلطة لك ولكن كيف؟
سدادة حزام امان السيارة: القاتل الصامت بالعربية
البتاعه ديه طلعت موضه من فتره كده و بقت تقريباً في كل عربيات مصر بما فيهم عربيتي و هي عباره عن كارثه في العربيه.
البتاعه ديه اللي هي سكاتة الحزام بتمنع صوت تحذير حزام الأمان و كأنك شادد الحزام و انت في الحقيقة سايق من غيره.
أولاً بالنسبة للحزام فطبقاً لدراسه ألمانيه بالتجارب فهو فعلياً بيقلل فرص الموت في حال وقوع حادث بنسبة ٦٠٠٪ يعني نسبة الموت في حالة القياده بدون حزام نتيجة للحادث بتزيد ٦ مرات.
هتقولي يا عم الغاوي الأعمار بيدي الله عشان انت مصري انا عارفك 😁 هقولك و نعمه بالله يا سيدي بس انت كمان ما ترميش نفسك في التهلكه و تقولي الأعمار 😉
نقطه كمان مهمه جداً هي ان معظم أنواع السيارات دلوقتي نظام الإير باج فيها ما بيشتغلش غير لما تكون شادد الحزام.. يعني في حال وقوع حادث و انت مش لابس الحزام مافيش إير باج هيفتح.
و لو انت حضرتك بقى حاطط السكاته ديه فكده الإير باج هيفتح و ببساطه مع اندفاعك للأمام نتيجة الصدمه من الحادث و مع قوة ضغط الهوا اللي بيفتح الإير باج عادي جداً يكسرلك رقبتك في نفس اللحظه و تموت لا قدر الله ممكن من حادث تافه جداً كان ممكن تطلع منه من غير خدش لو متبع تعليمات الأمان.
موضوع حزام الأمان فعلاً مهم جداً و انا بقولك عن تجربه شخصيه جايز من غير ستر ربنا و حزام الأمان كنت آنا مت قبل كده في حادث كبير اتعرضتله و من حسن حظي كنت رابط الحزام اللي كان مثبتني في مكاني أثناء ما العربيه بتتقلب و بالتالي الحمدلله طلعت سليم و لو مكنتش لابس الحزام أكيد الضرر كان هيبقى كبير جداً و يصل للموت عادي جداً.
موضوع السكاته ديه بقى كارثه أكبر عشان انت هتتضر ضرر مضاعف في حال وقوع حادث لا قدر الله.
ضرر عدم استخدام حزام الأمان و ضرر صدمة الإير باج.
مهو مش معقول نبقى عمالين نتكلم عن وسائل الأمان و أهميتها في العربيات و اللي فيها ٤ إير باج و اللي فيها ٦ و ٨ و في الآخر انت تمشي من غير حزام حضرتك😉
يا راجل حتى الشركه اللي عملاها كاتبه عليها don’t use للناس عشان هي أصلاً كانت معموله لمهندسين الصيانه داخل مراكز الصيانه عشان يسكتوا بيها الحزام و هم شغالين مش عشان انت تشتريها تركبها مكان الحزام و تسوق عادي 😅
الخلاصه.. البتاعه ديه مميته يا جماعه محدش يستهون بيها و الكلام ليا معاكم والله🥲
المصدر: #مقالات_الغاوي
يمكنك الاطلاع على المزيد من المقالات المتعلقة بالسيارات مثل:
