كعادة الشركة التقنية الكبري في عمل مؤتمر للأعلان عن اهم المنتجات الخاصة بالشركة وخاصة التقنية منها كانت لنا وقفة مع مؤتمر شكرة ابل وايفنت WWDC، وفي هذا الموضوع تشاركنا Low quality tech content اهم ما تم ذكره في ايفنت أبل لسنة 2022.
مؤتمر WWDC 2022: أهم الميزات والابتكارات من أبل
شوفنا ايفنت WWDC دسم جداً من ابل النهاردة، من هاردوير لسوفت وير وتفاصيل كتير جداً، انا جاي النهاردة احكيلكم الحاجات اللي لفتت انتباهي في WWDC 2022خلونا نقسم البوست لأقسام، كل قسم هيتكلم عن جهاز معين واي الحاجات الجديدة اللي ليها علاقة بيه، طبعاً اول حاجة بديهية نبدأ هي الايفون.. ف تعالى اكلمك عن الحاجات الجديدة في iOS 16
اول حاجة بنشوفها لما الايفنت بيبدأ هي الـLockscreen customization، ابل بعد قرون من الانتظار قررت تضيف تعديلات بسيطة ع اللوك سكرين تقدر تعملها عشان تحسن شكلها وتجربة استخدامها.. التعديلات دي تتضمن الآتي:
تقدر تغير فونت ولون الساعة من اختيارات كتير، ومعاهم بيكون زي filters كده بتتعمل ع خلفية اللوك سكرين عندك عشان تتماشى مع الالوان الجديدة اللي انت اخترتها، والفلترز مش مجرد بتغير الألوان، لأ هي بتعدل ع الصورة بشكل اكبر خصوصاً لو فيها اشخاص والحقيقة الموضوع لطيف
كمان تقدر تزود من امكانية التعديل عن طريق انك تعمل presets لـ خليط معين من خلفية مع فونت ساعة مع ويدجيتس وبتقلب بينهم عن طريق انك تدوس ضغطة مطولة ع اللوك سكرين وبيجيبهملك قدامك
تقدر دلوقتي تضيف widgets في اللوك سكرين، غالباً هنا هتكون زي الويدجيتس بتاعت الهوم سكرين بالظبط لكن الأحجام اللي تناسب المنطقة اللي تحت الساعة طبعاً
مكان النوتيفيكيشنز دلوقتي اتغير وبقى من تحت عشان مايغطيش ع صورة اللوك سكرين اللي انت حاططها، والنوتيفيكيشنز بقت مضغوطة مع بعض كده وتقدر تقلب فيها لو عاوز
تالت حاجة وهي الـLive activities وهي الحل الخاص بأبل عشان يقلل من ازعاج انواع النوتيفيكيشنز اللي مصممه انها تيجي كتير في وقت قليل، على سبيل المثال لو انت محمل ابلكيشن بيجيبلك نتايج ماتش معين وكل ما فريق يجيب هدف يبعتلك نوتيفيكيشن، الموضوع هيكون مزعج حبتين، البديل لـ ده هو زي Card كده بتحدث المعلومات بتاعتها بشكل live بناءاً ع التطبيق اللي عاملها، يعني مثلاً زي مثال نتايج الماتش هتجيلك ع هيئة كارد وكل ما فريق يجيب هدف الكارد هيتحدث بالهدف ده، كذلك لو طالب اوبر مثلاً هيظهرلك بشكل live خط تخيلي للمسافة بينك وبين العربية وكل ما يقربلك كل ما تلاقي العربية بتتحرك قدامك
طبعاً الكلام ده كله مش هيكون متاح كده من ابل، وعشان كده عملوا Live activities api عشان يسهل ع المطورين انهم يضيفوا مميزات زي دي في التطبيق بتاعهم
- فاكرين الـFocus اللي اتكلموا عنه السنة اللي فاتت؟ ابل زودت عليه ميزة انك تحدد لوك سكرين معينة لكل Focus mode بحيث انك مثلاً في الشغل يبقى لوك سكرين معينة بويدجيتس تخص الشغل، مع عيلتك تبقى لوك سكرين تانية بويدجيتس وخلفية تخص العيلة، وحاجات زي كده
ميزة Live text اللي بتخليك تعمل كوبي لكلام من الصور دلوقتي بتشتغل ع الفيديوهات كمان، وبرضو تقدر تترجم اي كلام قدامك بالكاميرا بشكل Live بس دي مش حاجة جديدة عشان شوفناها قبل كده ف google translate
في Apple maps في تحسينات مبهرة الحقيقة، زي انك هتشوف الخريطة بشكل ثلاثي ومن الزوايا اللي تختارها لكن الميزة دي وغيرها من مزايا maps مش هتكون متاحة في مصر، مش في اي وقت قريب ع الأقل
الميزة اللي ابهرتني بجد هي Apple car play اللي دلوقتي بقت تمتد للمكان اللي فيه عدادات العربية، في موديلات العربيات الجديدة اللي هتدعم الميزة دي، مكان العدادات هيكون فيه شاشة واحدة كبيرة، تقدر بقى تختار اكتر من شكل للعدادات ع الشاشة دي، او تعرض navigation للوكيشن معين، وفيه اوبشنز تانية كتير لأشكال والوان عدادات كتيرة جداً، الحقيقة انا مش متأكد انت اللي بتختار الأشكال ولا المصنع اللي بيختار بس في الحالتين الميزة دي جميلة وليها potential كبير
خلصنا iOS ؟ تعالى ندخل ف الـApple watch
الـWatch OS 9 نزل فيه حبة مزايا جديدة، مبدأياً نزلوا 4 Watch faces جداد وواحد منهم فيه منه اوبشنز الوان كتير الحقيقة
نزل برضو امكانية متابعة history الـatrial fibrillation ودي حالة طبية بتحصل للقلب بتخلي النبض غير منتظم واحياناً مرتفع بشكل طبيعي، الـApple watch بتـdetect الموضوع ده لكن دلوقتي هتقدر تتابع تاريخ الحالة دي وحصلتلك قد ايه ف آخر فترة
اما بقى اكتر ميزة عجبتني وهي ميزة الـMedications اللي بتقدر من خلالها تدخل الأدوية اللي بتاخدها بمواعيدها والساعة بتفكرك بيها، الحلو مش الميزة نفسها لإن فيه حاجات كتير شبه كده، بس سهولة اضافة الأدوية عن طريق تصويرها بس والموبايل بيعرفها لوحده وكمان تقدر تشارك ادويتك واذا كنت اخدتها ولا لأ مع حد من عيلتك او اي حد تاني
كل ده بيضيف طبقة اطمئنان زيادة للناس اللي بياخدوا ادوية وهيبقى خطر ع صحتهم لو نسيوها
المميز برضو انها مش حصرية لمستخدمين الابل ووتش، لو معاك ايفون لكن مش معاك الساعة تقدر تستخدمها عادي
كمان ضافوا امكانية متابعة الـsleep stages او مراحل النوم واللي الحقيقة كنت مستغرب جداً انها لحد دلوقتي مش موجودة ف الابل ووتش بس ماعلينا
فاكس الابل ووتش المملة بقى وتعالى ندخل في الماك
فقرة الماك منقسمة لنصين، نص هاردوير ونص سوفت وير ف تعالى نتكلم عن الهاردوير الأول
ابل اخيراً اعلنت عن الـApple M2 وهي التشيب الجديدة الخاصة بأبل للـcomputers
ابل وهي بتقدم التشيب دي مكانتش بتقدمها ع انها هتدي اداء خارق مقارنةً بالجيل اللي فات، هما قالوا بالحرف كده انهم بيركزوا ع انهم يقدموا افضل اداء ممكن بأقل استهلاك طاقة ممكن، والصراحة انا مبسوط بالـapproach ده جداً
لو جينا بقى لمقارنة الأرقام ف هنلاقي ان الـM2 بتدي اداء معالج اعلى من الـM1 بنسبة 18% تقريباً واداء رسومي اعلى بنسبة 35%
غالباً ده راجع لإنهم ضافوا انوية زيادة في الكارت الرسومي وكمان زودوا كفائة المعالج نفسه، تحسين بسيط لكن مهم برضو وهو زيادة الذاكرة العشوائية في التشيب لحد 24 جيجابايت، مقارنةً بـ8 جيجا بايت بس في الـM1 واللي كان رقم قليل نسبياً حتى وقت نزوله
لما نيجي نقارن الـM2 بمنافسين من برا بقى ف ابل قالت انه مقارنةً ببروسيسور بـ10 انوية من لابتوب تاني، ف الـM2 هيقدم نفس الأداء بربع استهلاك الطاقة، الجهاز اللي كانوا بيقارنوا بيه هنا هو Galaxy book ببروسيسور انتل الجيل الـ12 فئة U
اما بقى لما نقارنه ببروسيسور من الحاجات التقيلة دي، ف ابل بتقول انه هيقدم 87% من الأداء بتاعه لكن بربع استهلاك الطاقة برضو، وهنا المقارنة كانت بلابتوب Msi prestige 14Evo ببروسيسور Core i7-1260P
طيب ده الـM2، ايه اللابتوبات اللي بـM2 بقى؟
اول حاجة يا سيدي هي الجيل الجديد من الماك بوك اير، واللي اخيراً اخد التصميم الجديد للماك بوك زي الماك بوك برو ابو نوتش اللي شوفناه ف آخر ايفنت لـ ابل
تصميم الـbody بشكل عام اختلف برضو وبقى واخد نفس شكل البرو الـ14 انش، واكيد مع التصميم الجديد الـMagsafe رجع هنا كمان
فيه حبة تحسينات برضو للكاميرا والسبيكر بس مافهمش تفاصيل كتير يعني
واخيراً الماك بوك اير بقى بيدعم شحن سريع 67 وات بيخليه يشحن 50% ف نص ساعة
وسعره هيكون 1200 دولار
تاني واحد بقى وهو الماك بوك برو الـ13 انش، وهيكون بنفس التصميم القديم بكل المزايا القديمة لكن هيتحط فيه الـM2 بس، وسعره هيكون 1300 دولار
نتكلم بقى عن MacOS Ventura وهو اسم الإصدار الجديد
اول حاجة عرضوها هي طريقة جديدة عشان تدير بيها النوافذ الكتير اللي عندك وهي Stage manager، الميزة دي بتساعدك انك تركز بس ع النافذة اللي انت فاتحها والباقيين كلهم بيبقوا ع جمب الشاشة بشكل مصغر كده
اول ماتحتاج نافذة منهم مجرد هتدوس عليها وهتطلع هي ع الـ"Stage" زي ما بتقول ابل كده :"D
الصراحة فكرة لطيفة وهتسهل زحمة النوافذ الكتير خصوصاً للناس اللي شغلهم بيعتمد ع الكلام ده
تاني ميزة عجبتني وهي امكانية انك تستخدم كاميرا الايفون بتاعك بدل الـWebcam، وده عن طريق اكسسوار كده بيمسك في موبايلك عن طريق مغناطيسات الـMagsafe وبعدها بتعلقه ع الجهاز من فوق سواء كان لابتوب او iMac، بعدها بمجرد ماتفتح Facetime مثلاً هتلاقيه استخدم كاميرا الايفون علطول وتقدر تستخدم مميزات المعالجة كمان عليها زي البورتريه و Stage lighting modes
الـSpot light search اتضاف فيه مزايا برضو زي انك تقدر تعمل منه actions زي انك تعمل تايمر او منبة، كمان بيعمل سيرش ف السيستم كله او اونلاين
فيه برضو تفصيلة كده محدش ركز عليها في الايفنت وهي Passkeys، فكرتها باختصار انك بتسجل دخولك ف الخدمات اللي بتستخدمها عن طريق الـ biometric authentication زي بصمة صباعك او وشك ، المميز انها هتكون universal مش ع اجهزة ابل بس، وده بالتعاون مع الشركات التانية زي جوجل وميكروسوفت
فيه ناس ممكن تقول انها فكرة وحشة بس الصراحة شايف انها عملية اكتر من الباسوردز، وفي بعض الأحيان آمنة اكتر
واخيراً وليس آخراً، نتكلم عن الايباد
الـiPad OS 16 اتضاف فيه حاجات مثيرة للاهتمام الحقيقة، اه مش التغيير اللي بندور عليه لكن يعتبر بداية
مبدأياً الـStage manager اللي اتكلمنا عليه فوق بقى موجود بنفس الشكل في الايباد ودي حاجة ممتازة
ثانياً بقيت تقدر دلوقتي توصل الايباد بشاشة خارجية عن طريق تايب سي وتستخدم الشاشة دي ك workspace اضافية بدل ماكان الاوبشن الوحيد زمان هو انك تعمل mirror للشاشة، وتقريباً ده بدوره حل مشكلة اختلاف الـaspect ratio لإن الشاشة بقى يجيلها بيانات تعرضها ع اي aspect ratio مش بيانات بـaspect ratio بتاع شاشة الايباد
اتكلموا برضو عن حاجة اسمها desktop-class apps، وده باختصار فكرته ان تطبيقات النظام هتديك behaviour شبيه بالموجود ع الماك os
يعني ع سبيل المثال هتلاقي undo و redo في السيستم كله، اضافات كتيرة للـfile manager تديك امكانيات اكتر
وده اللي كنت اقصده لما قولت انه خطوة في اتجاه ان الايباد يبقى utilized بشكل اكبر ونستغل الهاردوير اللي فيه
واخيراً خاصية Reference mode واللي بتخليك تستخدم شاشة الـiPad Pro او Air بتاعك - لازم يكون Mini led - عشان تظبط الألوان ع اي جهاز تاني، بحيث انك تعرض المحتوى عليها وتظبط الألوان بتاعت الصورة او الفيديو ع اساسها وده لإنها المفروض بتيجي بـcolor accuracy عالية وممكن تكون اعلى من الشاشة اللي بتشتغل عليها، لكن الميزة دي مش هيكون ليها فايدة للناس اللي اصلاً عندهم شاشات احترافية
وبس كده، دي كانت كل حاجة تستحق الذكر في مؤتمر المطورين الخاص بأبل لعام 2022، ايه اكتر حاجة لفتت انتباهك وحابب انك تجربها ع الحقيقة؟
