الموضوع مش سهل زي ما أنت متخيل، واحدة من مساوئ السوشيال ميديا هي إنها سهلت لنا كل حاجة، وبقينا نحس إن كل حاجة سهلة ومتاحة، وده إحساس في حد ذاته ميشجعش أي حد إنه ينجح، أيوه زي ما بقول لك كده، تعالى أقولك يعني ايه الكلام ده؟
كيف يؤثر استخدام السوشيال ميديا على الأداء الوظيفي والإنتاجية؟
- فيه كام واحد فينا دلوقتي من كتر ما سمع عن الناس اللى بتكسب من اليوتيوب، بقى عايز يعمل قناة، عشان يكسب زيهم ويبقى مليونير يعني والجو ده.
- فيه كام واحد فينا دلوقتي بقى متخيل إنه بمجرد ما هيعمل صفحة وينشر عليها كام صورة لمنتجات قرر يتاجر فيها، ويعمل إعلان ممول، إنه هيصبح من رجال الأعمال؟
- فيه كام واحد كلم أصحابه، ويلا بينا يا رجالة نعمل موقع وننشر عليه مقالات أو بضاعة ونجيب زيارات ونكسب فلوس من أدسنس ونبيع وكده، وحاول يقنعهم إن كل الناس عاملة كده وبتكسب كده.
- فيه كام واحدة دلوقتي لما شافت واحدة بقت مشهورة وبتعمل إعلانات لبراندات وبتسافر وتنزلها ستوري كل شوية من دولة شكل، عايزة تبقى زيها!
- فيه كام واحد صدق الفيديو اللى سمعه على اليوتيوب لواحد بيشرح ازاي تكسب 1000 دولار من النت وأنت قاعد في البيت!
- فيه كام واحد دلوقتي راح كلف نفسه واشتري كاميرا أو موبايل غالي بكاميرا نضيفة وقعد يشتري في وحدات إضاءة ويعمل لوكيشن عشان يصور فيديوهات، وجاب المعدات دي وركنها جنبه ومش عارف هو المفروض يعمل ايه ولا يسجل ازاي ولا هيتكلم فيه أصلاً!
عايز أقولك إن كل اللى فوق ده بلح!
تأثيرات السوشيال ميديا السلبية على الصحة النفسية
يعني يا صديقي يا حبيب قلبي مفيش حاجة اسمها تكسب ألف دولار في يوم وأنت لسه مبتدء، ركز كده شوية، لو الموضوع حقيقي، مكنش حد نزل من بيته عشان يشتغل ولا هتلاقي حد شغال في مصالح حكومية ولا في أي مكان أصلاً وكله قعد في بيته وقعد يعد في الدولارات.
ولا فيه حاجة اسمها تعمل صفحة وتعمل إعلان وهتكسب، عايز بس أقولك إنك مش عشان خدت نفس خطوات اللى قابلك عملها، إن ده معناه إنك لازم تكسب زيه، لأ لأ لأ خالص، الموضوع محتاج دراسة وفهم وتجارب وخبرة كبيرة هتكتسبها من المشاكل اللى هتقابلك،
وتبقى فاهم الخطوات اللى بتعملها والهدف اللى عايز توصله، وهنا تجدر الإشارة إلى إني بتسثني الناس اللى بتقدم هلس وأي حاجة في أي حاجة وبتكسب من السوشيال ميديا لأن دول ليهم قصة تانية مش وقته شرحها.
كيف تؤثر السوشيال ميديا على الثقة بالنفس وصورة الذات؟
حابب أكد لك إن مفيش حاجة اسمها هتاخد كورس وتخرج منه تبقى حوت في الشغل، كل دي خطوات بتحطك على الطريق وبتنور لك بس بعض الأمور إنما أنت لو ممشتش وجربت وكان عندك صبر وجهد وتتستغل وقتك صح، عمرك ما هتوصل لحاجة وهتضيع وقت وخلاص وهتفضل في مكانك، الموضوع مش سهل ولا صعب، الموضوع محتاج ناس بتحب المعافرة وعندها هدف وجهد ومثابرة عشان توصل للي عايزاه ..
اقرأ كده عن المشاريع والشركات الناجحة دلوقتي كانت بدايتهم ازاي، وشوف الناس - المحترمين - اللى مشهورين دلوقتي أو بيكسبوا من اليوتيوب أو الفيسبوك، هتلاقيهم في بداياتهم اتبهدلوا واطحنوا واتعرضوا لمواقف عاصفة عشان يوصلوا للي هما فيه دلوقتي، لكن نظرة البعض القاصرة خلتهم يشوفوا اللقطة الأخيرة بس والمكاسب اللى الناس بتكسبها، لكن مخلتهمش يفكروا هي الناس وصلت لده ازاي، وده اللي بقولك عليه إن السوشيال ميديا ساعدت في تغييب الجزئية دي، إنها خلتك تحس إنك بمجرد ما هتعمل قناة أو صفحة زيهم فأنت بالتالي هتنجح زيهم وهتكسسب زيهم
وخلتك تحس إن بمجرد إنك عندك فكرة في دماغك إنك في ثواني تقدر تنفذها وهتكسب كتير وهتبقى من أصحاب المال، وخليتك تحسي إنك بمجرد ما هتسجلي فيديو تتكلمي فيه في أي موضوع إنك هتبقى من المشهورين وإنك تاني يوم هيستضفوكي في قناة فضائية وتتكلمي عن رحلة نجاح الفيديو اللي كسر الدنيا.
مساوئ السوشيال ميديا على التواصل الاجتماعي الحقيقي
الناس للأسف بتيجي عند التطبيق وبتتصدم وبتخسر كتير وبتدرك إن فعلا الموضوع عكس ما كان متخيله تماماً، الموضوع بيتلخص في المثل المشهور "اللي إيده في المايه مش زي اللى إيده في النار"، سهل جدا تقعد تِنَظٌر وتتكلم، لكن تعالى نفذ كده أو إتحط في موضوع تنفيذ هتلاقي نفسك بتبص للأمور بزاوية تانية خالص غير اللى أنت كنت بتبص لها قبل ده، لأن المستجدات اللى هتقابلك أثناء التنفيذ مكنتش في حساباتك وأنت قاعد تقول كلام نظري بس ..
جزء مهم جدا في طريقك للنجاح هو إنك لازم تبقى فاهم إنك هتتحارب كتير بسبب وبدون سبب ومش كل الناس هتساعدك عشان تنجح ومش كل اللي حواليك لازم يبقوا مؤمنين بيك أو باللي بتعمله، وإنك لازم تفشل وتخسر، فيه ناس مبتقدرش تستوعب ده، فمبيقدرش يكمل ومن أول مطب أو عقبة أو مشكلة بيقف ومبيكملش، يا شباب البدء لا يعني حتمية الوصول، أهم حاجة الإستمرارية في السعي، لازم تفهم وتؤمن وتستوعب إن جزء من نجاحك هو تَقبُل فشلك وعشان تكسب لازم تخسر وتبقى مبسوط بكل التجارب اللى بتمر بيها سواء حلوة أو وحشة، عشان ده اللى يخليك تكمل وتكسب وتنجح ..
المقال بواسطة: مهندس/ عبدالرحمن شهاب الدين
