ناس كتير بتسأل على موضوع تغيير أسماء صفحات فيسبوك , وللأسف انتشر إجابات كتيرة في الفترة الآخيرة وكل واحد بيرد بناء على كلمة سمعها من شخص تاني او تجربة فردية وفي الآخر الشخص بيتوه وسط الإجابات دى .
هحاول أقولكم في المقال ده كل ما يخص الموضوع ده , بناء على مئات التجارب اللى عيشتها بنفسى خلال الفترة اللى فاتت .
بالنسبة لتغيير اسم الصفحة , دى خاصية متاحة في فيسبوك , ان الشخص ممكن يغير اسم صفحته من خلال طلب رسمى بيقدمه من خلال اللينك ده :
https://web.facebook.com/help/contact/285180098481281
لكن الموضوع فيه تفصيل كتييير :
1.اللى متاح ومفيش فيه ضرر انك تعدل في اسم الصفحة , يعني مثلا تضيف كلمة او تشيل كلمة , او تعدل الاسم لو مكتوب غلط , او فيه حرف قبل , او عايز تبدل كلمة قبل كلمة , هقول مثال عشان يبقى الموضوع واضح :
صفحة مثلاً اسمها " أحمد محمد " ممكن أعدل فيها واخليها محبي أحمد محمد ,, أو ألتراس أحمد محمد ,, كل ده مفيش فيه مشكلة , وفيسبوك مش بيقفل الصفحة بعد كده .
2.تعالوا بقى للنقطة الأهم , وهي اللى حصل خلال الفترة اللى فاتت , واللى خلى فيسبوك يعمل مجزرة للصفحات الشهر اللى فات , وقفل صفحات كتيرة جدااا , "يوميا " كان بيجيلي رسائل ناس اتقفلت صفحاتها بسبب تغيير الاسم والدمج .
الناس بقى عملت ايه , بدأوا يتحايلوا على فيسبوك ويعملوا زي " أصحاب السبت 😃 " , ويلعبوا مع فيسبوك لعبة ظريفة أوى ,, لما بيقدموا طلب على تغيير الاسم " كلي " فيسبوك بيرفض الطلب فبدأوا يتحايلوا عليه,, يقوموا يعملوا ايه بقى ,, يقوموا يفضلوا يعدلوا في اسم الصفحة كل شوية لحد ما يوصلوا للاسم اللى هما عايزينه
يعني ايه بقى الكلام ده، هقولكم مثال عشان يبقى الموضوع واضح لكم :
مثلا أنا عندي صفحة اسمها " أحمد محمد " وعايز أغير اسمها أخليها " مصطفى حسن " لو قدمت طلب فيسبوك بيرفض , لان بيعتبر ده خداع للجمهور لأن الاسم اتغير كلي , أقوم رايح عامل إيه بقى
أقوم الأول أقدم طلب أخليها " أحمد محمد مصطفى " وبعد كده اعدل تاني " أخليها محمد مصطفى " وبعد كده أعدل تالت " أخليها " محمد مصطفى حسن " وبعد كده أشيل محمد وأخليها " مصطفى حسن " يبقى أنا كده غيرت اسمها من اسم لإسم تاني خالص .
كل اللى فات ده بقى , غلط ومخالف , لان فيه تحايل وفيسبوك الشهر اللى فات عمل مجزرة للصفحات ,, بسبب الموضوع ده , وكمان فيه صفحات اتقفلت بسبب الدمج , ان الناس كانت بتستخدم الطريقة دي عشان تغير اسم الصفحة لاسم صفحة تاني وتدمجها فيها.
في النهاية عايز أوضح شئ مهم :
واحد هيقولي , طب ما أنا غيرت اسم صفحتي " كلي " والصفحة شغالة وزي الفل بقالها فترة طويلة ومتقفلتش ,, هقولك جملة دايما أقولها للناس " فيسبوك مش بينسى " ممكن يسيبك فترة طويلة بدون ما ياخد إجراء ضدك , لكن مش معنى كده انه مش هياخده , ممكن تلاقي القرار جايلك في أي وقت ,, كل الناس اللى صفحاتهم اتقفلت الشهر اللى فات , كانوا مغيرين أسمائها من زمان , ممكن فترة أكتر من سنة , ولسه مقفولة الشهر اللى فات .
اللى فوق ده كله بيفكرني بقصة أصحاب السبت 😃 مهندس عبد الرحمن شهاب
مقالات أخرى قد تفيدك:
