Windows 11، ويندوز11، ماتيجي اكلمك شوية عن ويندوز 11؟ لو ماتعرفش انا بقول ايه فا احب اقولك ان ميكروسوفت اعلنت من شوية عن اخر اصدار من ويندوز واللي هو 11
بالرغم من انهم قالوا ان 10 هيكون اخر اصدار وانه هينزله تحديثات بس الا ان من الواضح ان كم التغييرات اللي حصلت مكانش ينفع يتقال عليها ويندوز 10 برضو
خلينا نبدأ بأول حاجة ملحوظة وهي كم التغييرات اللي في الـUi، مبدأياً التاسك بار اختلف بشكل كبير، الايكونز كلها بقت في نص وحتي الـstart menu معاهم
الواجهة بشكل عام بقت واخده ستايل glassmorphism اللي يحسسك ان النوافذ اللي قدامك دي ازاز ووراها blurred كده، حاجة شوفناها في الـMacOS واضافة مرحب بيها ف ويندوز الحقيقة
كمان الـaction center اختلف بشكل كبير جداً، تقدر تقول كده انهم اخدوا بتاع windows 10x وحطوه هنا، مابقاش ياخد جزء كبير من الشاشة ع اليمين والزراير بقي شكلها احلي وواخده نفس الـglassmorphism effect ده
وتقريباً كل حاجة دلوقتي بقت rounded ودي حاجة متأخرة يجي 5 سنين باين بس ان تأتي اخيراً خيرٌ من الا تأتي ابداً :"D
كمان فيه حاجات اساسية في الويندوز شكلها اختلف زي الـsettings اللي بقت احسن بكتير من العقيمة اللي في ويندوز 10، كل حاجة بقت متقسمه بشكل واضح وباينة قدامك من علي الجمب كده وده هيسهل حتة النافيجيشن كتير جداً
خلينا نسيب الـUi شوية ونتكلم عن كام حاجة في الـfunctionality بتاعت النظام، مبدأياً الـMulti tasking هنا اتحسن جامد اكتر ماهو اصلاً كويس، يعني مثلاً لو روحت لعلامة الـmaximize اللي في اي نافذه انت فاتحها هتلاقي ظهرلك كذا layout تقدر تقسم بيها النوافذ اللي فاتحها، وكمان الـlayouts دي هتتغير علي حسب حجم شاشتك يعني مش حاجة ثابتة وخلاص
كمان لو انت عملت تقسيمة معينة فيها 3 برامج وجيت فتحت برنامج رابع وطلعت من الجروب اللي انت فاتحه ده، تقدر ترجع الـ3 برامج اللي كنت فاتحهم بنفس الـlayout بضغطة واحدة وده هيسهل كتير الصراحة
من الحاجات الحلوة برضو في نقطة الـ continuity هي انك لو موصل شاشة خارجية للابتوب بتاعك مثلاً وفاتح علي الشاشة دي حاجات كتير وعلي شاشة اللاب حاجات تاني، اول ماتفصل الشاشة دي من اللاب كل الحاجات اللي انت كنت فاتحها عليها هيتعملها minimize واللاب يبقي عليه نفس الحاجات عادي، و اول ماتوصل الشاشة الحاجات هترجع مكانها عادي كإنك مافصلتهاش
آخر حاجة حابب اتكلم عليها هي الـWindows store، لإن فيه حاجات كتير اختلفت فيه الحقيقة، ومش بس ف الشكل
هو ك شكل فيه اختلاف كبير لإنه بقي مودرن اكتر والقوائم بقت واضحة اكتر وواخد نفس ستايل باقي الويندوز، لكن المميز هنا كام حاجة كده
اولاً ميكروسوفت هتسمع للمطورين بإنهم ينشروا جميع انواع التطبيقات عليه، مش بس UWP apps او PWA، يعني البرامج الـx86 العادية - اللي بتسطبها بملف .exe دي - هيبقي مسموح انها تنزل علي الستور عادي، وزود كمان علي ده ان المطورين هيبقي ليهم حرية اختيار منصة الدفع اللي ياخدوا فلوسهم منها سواء بتاعت ميكروسوفت - اللي هتخلي ميكروسوفت تاخد جزء من كل عملية دفع - او المنصة الخاصة بيهم واللي هتخلي كل الفلوس تروح للمطور
الكام حاجة دي هتشجع المطورين جداً انهم يتوجهوا للويندوز ستور، ولو سألتني ده هيفرق ف ايه هقولك انه هيبقي زي البلاي ستور علي الموبايل كده، مكان واحد بتنزل منه كل برامجك وبتحدثهم منه وبتعمل كل حاجة منه، وقليل ما بتحتاج تنزل حاجة من برا
وكـ icing on the top ميكروسوفت قررت تضيف دعم برامج الأندرويد لويندوز 11 بشكل native، والتطبيقات هتكون متاحة عن طريق قسم في الميكروسوفت ستور تبع Amazon app store، واللي اه تطبيقاته محدودة حبتين تلاتة اربعة
لكن طالما بقي فيه دعم native لتطبيقات الأندرويد علي ويندوز فا انا شبه متأكد ان الناس هتلاقي workaround عشان يشغلوا اي apk عليه
فيه حاجات تاني صغيرة زي ان Microsoft teams و xbox game pass بقوا built-in مع الويندوز ك خدمات ودي حاجة لطيفة نوعاً لو بتستخدمهم
وكمان Auto HDR في الألعاب
وبس كده، دي تقريباً كانت كل حاجة اتكلموا عنها في ايفنت الإعلان عن ويندوز 11، طبعاً انت هتموت وتعرف هينزل امتي
الـinsider build المفروض هتنزل في خلال اسبوع، اما النسخة النهائية المستقرة فا للأسف هتتأخر لنهاية السنة دي او بداية 2022، بس مش مهم لأن الحلال اجمل سأنتظر ❤
