هل الكراك حلال أو حرام؟ كل ما تحتاج معرفته

تجربة المهندس / احمد متولي مع الكراك

سنة 2004 تقريباً كنت باخد كورس dot net فى احد المراكز المشهورة فى مصر

وكنا بنتعلم وبنشتغل على visual studio 2003 فى المركز

فى يوم من الأيام دار الحوار ده بيني وبين احد الزملاء وطبعاً الكلام تقريبي لانى مش متذكر بالظبط

الزميل: - انا متضايق جداً .. المفروض يدونا نسخة من ال visual studio علشان نشتغل عليها فى البيت!

انا: = ما برضه مش هيبقى حلو فى حقهم لو اتعرف انهم بيوزعوا نسخ .. دي كدة قرصنة وممكن المصنفات تيجي تخربها عليهم

- ليه؟ قرصنة يعني ايه؟ ومصنفات مين؟

= لما تكون اقل نسخة من ال visual studio ب 1000 دولار والمركز يوزعها عليك ببلاش كدة هيجيب لنفسه مصيبة

- ايه!!

= امال انت فاكر ايه .. امال احنا بنجيب نسخة بكراك ليه .. مين فينا هيدفع 1000 دولار يعني

- .. !! ..

= لأ ثواني .. انت عارف ان الويندوز بيتباع بفلوس ولا لأ؟

- ايه!! ايه!!

فى الفترة الزمنية دي الناس كانت منقسمة الى نوعين
نوع عارف ان السوفتوير بفلوس .. وبفلوس كتير جداً كمان .. وان كل النسخ اللى بنبعتها لبعض دي مسروقة
ونوع عايش فى الالا لاند وفاكر ان الشركات بتعمل سوفتوير ببلاش او أصلاً مش فى دماغة ان فى شركات بتعمل حاجة اساساً
هو السوفتوير ده given .. حاجة كدة زي الماية والهواء.
طبعاً احنا كشباب صغير علشان نشتري كل السوفتوير اللى محتاجينه فدي كانت حاجة شبه مستحيلة
انا مرة حسبت تكلفة السوفتوير اللي على جهازي طلعت حوالي 10 الاف جنية
جهازي نفسه كان جهاز gamming جامد تنين وبيطلع نار من كارت ال nvidia اللى فيه كان ب 4 الاف جنيه ساعتها
فموضوع شراء السوفتوير ده مكنش مطروح للتفكير من الأساس
ده غير ان بعض السوفتوير كان صعب اصلاً تقوم بعملية الشراء حتى لو عندك النية
لكن .. انا واتنين آخرين كنا نشعر بوخز الضمير .. اى نعم معلمناش حاجة بس مكناش مرتاحين
احنا بنعمل حاجة حرام ومش عارفين نبطلها
وكان فى ناس مريحة دماغها وماشيين ورى فتوى ان ده حلال عادي !!!!!
ما علينا.

------------------------------
النهاردة الوضع مختلف
مالكش اى حجة تستخدم سوفتوير مسروق
اى سوفتوير انت بتشتغل بيه هو فى الأساس بفلوس يا اما بقى رخيص عن زمان يا اما له بدائل قوية مجانية
وزمان حتى كان فى بدائل قليل وضعيفة .. النهاردة فى بدائل أقوى من الأصل
النهاردة انت محظوظ ان بقى فى نسخة مجانية من visual studio وكل ادوات ال development تقريباً مجانية .. الا بعض الأدوات الأضافية اللى لو فى شركة احتاجتها فهى هتشتريها وانت هتشتغل بيها فى الشركة .. مش محتاج تدور عليها مسروقة
الويندوز بقى يجي برخصته مع اللابتوب .. واصدارات لينكس بقت افضل من زمان بكتييييير فى حالة لو جهازك مابيجيش عليه ويندوز
انا قعدت فترة مستحمل سئالة ورذالة اصدار desktop معين من linux ولا انى ارجع للويندوز المسروق. النهاردة السئالة والرذالة دي اختفت

لو بتشتغل design فبدائل ال Photoshop بقى لا حصر لها .. عندك inkscape وعندك photopea وغيرهم
وعندك canva ده ممتاز جداً وبيخليك تعمل designs شيك وسريعة للأستخدامات اليومية التقليدية
ال 3d عندك blender.

لو بتعمل video editing عندك حتة سوفتوير اسمها davinci .. اللى انا مش فاهم ازاى شركة black magic منزلاه مجاني .. ده software فوق العظمة بشوية .. بدل ما تدور على Adobe premiere مسروق

ولو davinci تقيل عليك وعايز video editor بسيط جداً بتاع قص ولزق عندك openshot
بتصور raw من كاميرات professional وبتستخدم lightroom مسروق .. عندك darktable ببلاش.

لو عايز حاجة لل screen record طبعاً انت بتستخدم camtasia بكراك .. ليه؟ ما عندك OBS studio ده studio متكامل لل recording وال streaming .. ببلاش!

عايز ايه تاني.. اياً كان اللى انت بتستخدمه ادخل على جوجل واكتب اسم البرنامج ثم بعديه اكتب free alternative
وهتلاقى أكيد بدائل مجانية

انا مش جاي اقولك ان البدائل دي كلها احسن .. وان كان فى منها فعلاً احسن .. انا بس جاي اقولك لو مش عايز تشتري يبقي ماتسرقش واستخدام البدائل المجانية

لو انت شاري خلاص enjoy
ولو انت مكنتش تعرف ان ال software بفلوس اديك عرفت
live with it / Ahmed Metwally

تابع: