للأسف يعتمد الكثير من النصابين "اللصوص" علي حسن نية الضحية وبهذه الطريقة بيتم سرقة ماستر كارد من اصحابها بشكل قد يبدو بسيط جدآ ولطن للأسف يقع ضحية الكثير من اصحاب المعاشات وقبض المرتبات، وفي هذه التدوينة سنلقي الضوء علي كيف يتم سرقة البطاقة المصرفية من اصحابها بطريقة بدائية.
موضوع خطير جدا اتمني يوصل لاكبر عدد ممكن ( للتوعية )
بحكم شغلي في احد البنوك بقيت بقابل حالة سرقة منتشره اليومين دول بشكل زايد جدا جدا ، الموضوع دا كنت بشوفه من حوالي سنتين حالات فرديه
انما دلوقتي الموضوع اصبح بيحصل يوميا ، والموضوع بالنسبه للحرامي مجزي جدا وسهل بشكل كبير
القصه ان الحرامي واقف جمب مكنة ATM منتظر حد جاي يسحب ويتوسم فيه انه علي نياته او كبير سنا او ست ومعاها اولادها وملبوخه او عاجز مش عارف يطلع سلم ال ATM
اول طريقه
انه ياخد الكارت وياخد الرقم السري ويقوم هوا بكل حاجه الاول يستعلم ويشوف الرصيد ويدوس cancel عشان الكارت يطلع ويقوم مبدل الكارت بكارت تاني ( مسروق برضه ) في ايده ويحطه تاني عشان يسحب ويدخل الرقم السري طبعا الكارت هيتسحب يقول لصاحب الكارت بكره تعالي البنك واستلم كارتك ويروح علي اي مكنه تانيه يسحب كل الرصيد و لحد ما العميل يكتشف يكون نفض رصيد الكارت .
الطريقه التانيه
انه يلمح الرقم السري والعميل بيستعمله وبعدين برضه يدخل علي انه بيساعد وبرضه يبدل الكارت ونفس الحوار يحصل
الغرض من القصه انه ياخد الكارت وال PIN ( الرقم السري ) بتاعه
وطبعا بمساعدة صاحب الكارت
الموضوع دا ناس اتسرق منها بال ٣٠٠ الف من غير ما تعرف والموضوع بمنتهي السهوله
ياريت البوست دا ينتشر في كل حته لعل وعسي نوقف الموضوع دا ، انا بصراحه مش لاقي اي وسيله اني اوعي الناس اكتر من ان احاول اوصل البوست لاكبر عدد
وزي ما موضوع ان المكنه بتخصم ٥٠ جنيه من اللي مش لابس كمامه ، والموضوع كان هجص وانتشر ( مع انه انتشاره مفيد ) ياريت الحاجه الواقعيه تنتشر برضه
*** للتوضيح في ناس مش بتعرف ان كارتها اتبدل لفتره ممكن شهور عادي وكل يوم اللي سرق الكارت يسحب الحد الاقصي ***
وللتوضيح برضه : انا مسئول عن كل كلمه اتكتبت في الموضوع بدون تهويل ولا معلومات غلط وبدون نقل عن حد برضه وكل حاجه مكتوبه انا شفتها بعيني وفاهم كويس انا كاتب ايه
شير البوست علشان يوصل اكبر عدد ممكن من الناس
اسف جدا علي الاطاله
منقول
