في هذا المقال يشاركنا ا/ احمد مصطفي تجربته في تغيير الوظيفة المدونة عاب بطاقة الرقم القومي واثبات العمل الحر الي مصمم غرافيك وهي طريقة يبحث عنها العديد من اصحاب العمل الحر علي الانترنت freelancer.
هشرحلك الموضوع بالتفصيل عشان تبقى فاهم الدنيا ماشية ازاى ، صلى على النبى
دلوقتى حضرتك سواء فرى لانس او شغال فى شركة ، اكيد مش متأمن عليك ، وبالتالى لما هتروح تجدد بطاقتك وعايز تعمل وظيفة مصمم جرافيك هتقولك خد الاستمارة امضيها فى التأمينات ، وانت مش متأمن عليك وبالتالى كدة الموضوع باظ ومفيش اضافة الوظيفة دى ، طيب لو متأمن عليك ؟ التأمينات هتختملك انك مصمم جرافيك لانك تابع لهيئة او شركة ومتأمن عليك بإسم وظيفتك
لحد كدة جميل ؟ طيب انا مش موظف ، انا على باب الله شغال اون لاين
فى الحالة دى الدولة وفرتلك خاصية اسمها (مزاولة مهنة) وهنا تبدأ الخطوات (انا من اسكندرية هشرحلك اللى حصل معايا)
1- هتروح مديرية القوة العاملة (مش مكتب عمل صغير) دى الإدارة العامة
2- هتقولهم عايز اعمل (ترخيص مزاولة مهنة)
3- هتحددلهم الوظيفة مصمم جرافيك
4- هيتحددلك مكان يختبروك فيه (مش ساعتها) لا ده يوم تانى
5- يومين وهتروح تستلم النتيجة عبارة عن (كارنيه ورق مكتوب فيه انك مصمم جرافيك + شهادة كرتونية بإسمك وتقديرك سواء محدود او ماهر
6- هتمضى استمارة السجل المدنى من القوى العاملة انت خلاص بقت مصمم جرافيك اد الدنيا
7- هتسلم الاستمارة فى السجل المدنى وتخش تتصور والف مبروك
انا عارف انك هتسألنى شوية اسئلة كدة ، ماشى هرد عليك
الامتحان عبارة عن ايه ؟
هتخش مكان عامل زى (نت كافيه) اجهزة كتير وواحد بيسألك شغال ع برنامج ايه هتقولو البرنامج اللى انت شغال عليه ، هتقعد ع جهاز هيطلب منك تعمله تصميم خفيف خالص ، هيسيبك 10 دقايق ويرجعلك يقولك تمام شكرا حتى لو مخلصتش هو ليه نظرة انت فاهم ولا بتكدب عليه 🙂 وخلى بالك الاجهزة مفيش عليها نت يعنى مش هتعرف تنزل تمبلت وتعدل عليه انت بتشتغل ع الموجود فى البرنامج نفسه
المصاريف كام والورق المطلوب ؟
حاجات رمزية ماتعديش ال200 جنيه لزوم استمارة وتقديم
مطلوب من حضرتك صورة بطاقتك + 2 صورة شخصية (4×6)
التقدير هيفرق معايا ؟
لو انت مسافر برة مصر هيفرق معاك وبتحاول تفهمه انك مسافر برة مصر عشان يراعيك لان شكلها بايخ مسافر برة تشتغل مصمم جرافيك ومكتوب فى شهادة الخبرة انك (خبرة محدودة)
طيب لو مش مسافر ؟
معتقدش هيفرق معاك التقدير لان سواء محدودة او ماهر هيتكتبلك فى البطاقة مصمم جرافيك بردو 🙂
اخر حاجة عايز اوضحهالك انت بالشكل ده متسجل فى 4 وزرات انك مصمم جرافيك ، وزارة العمل ، والسجل المدنى ، والمديرية ، ومش فاكر الاخيرة بصراحة ، والموضوع مالوش علاقة ان ينزل عليه تأمينات او ضرايب ، والكارنيه اللى بتستلمه من القوى العاملة انك مصمم جرافيك بيتجدد كل 5 سنين
مقالات قد تفيدك:
By | احمد مصطفى
