تطبيق "واتس آب" بيحاول يحافظ على مستخدميه ويجذب مستخدمين جدد ، خصوصاً إن تعديلات الخصوصية اللي اتكلمنا عنها النهاردة هاتعمل ضجة كبيرة .
واللي هاتكون فيها مشاركة البيانات بين "واتساب" و "فيسبوك" إجبارية بدءاً من 8 فبراير 2021 بعد ماكانت إختيارية.
نرجع تاني للمميزات اللي متوقع تطبيق الدردشة يضيفها بحسب موقع "gadgetsnow" التقني وهي :
🟩 مكالمات الصوت والفيديو لـ "واتس آب ويب" :
ودي واحدة من أكثر مميزات "واتس آب" المنتظرة، واللي هاتسمح للمستخدمين بإجراء مكالمات صوتية ومرئية مباشرة من "واتس آب ويب".
🟩 دعم متعدد للأجهزة المختلفة :
"واتس آب" شغال دلوقتى على اختبار دعم متعدد الأجهزة، واللي هايتيح إضافة أكثر من جهاز لحساب واحد .
🟩 القدرة على كتم صوت الفيديو قبل الإرسال :
قريباً هانسمع عن الخدمة دي واللي هايسمح "واتس آب" بيها للمستخدمين بكتم صوت مقاطع الفيديو قبل إرسالها إلى جهات الاتصال الخاصة بهم.
الميزة دي هاتتيح رمز "مكبر الصوت" اللي هايكون متاحًا على الجانب الأيسر من الفيديو ، ده بالاضافة لمدة وحجم الملف، وهايتمكن المستخدمون من النقر فوق الرمز ده لكتم صوت مقطع فيديو قبل مشاركته.
🟩 ميزة "إقرأ لاحقًا" :
من المميزات العظيمة اللي هاتسمح بقراءة الرسائل المبعوتة ليك لاحقًا ، بس مفيش تفاصيل كتيرة عنها حالياً .
🟩 الانضمام إلى مكالمات المجموعة الفائتة في أي وقت:
من التسريبات برضه إن "واتس آب" هايقدم دعم للمستخدمين للانضمام إلى المكالمات الجماعية الفائتة في أي وقت.
الميزة دي هاتسمح للمستخدمين بالانضمام إلى مكالمة جماعية حتى لو فات المستخدم مكالمة في حالة عدم انتهائها.
🟩 القدرة على إرفاق صور وفيديوهات متعددة :
يقال إن الميزة دي هاتتاح الأول لمستخدمي" iPhone" ، واللي من خلالها هايتمكن المستخدمين من إرفاق صور ومقاطع فيديو متعددة بشكل متطور.
🟩 حلول التأمين الصحي :
الخدمة دي هاتكون موجهة لقطاع التأمين الصحي والمعاشات الجزئية ، واللي من خلالها هاتوفر منصة الرسائل الفورية البيانات و خدمات المعاشات للمستخدمين .
الشركة طبقت ده جزئياً في الهند، ومتوقع تتوسع فيه في باقي دول العالم خلال 2021 .
